一般家居裝修需要幾耐？詳細時間表話你知！

點先可以知道裝修公司有無拖工期？又有冇得加快裝修進度？今次為大家準備咗一般裝修流程時間表，方便你預算幾時有得入伙！

裝修前期：10至15日

• 前期一般用10至15日嚟揀裝修公司同埋擬定裝修設計圖。

小提示：如果需要訂製櫥櫃，可以喺前期階段搞咗先，因為一般需時20至35日，早啲訂就可以避免因為無貨而拖慢裝修進度。

裝修中期：30至40日

裝修中期所牽涉嘅部份比較多，大致上可分為水路改造、泥水、木工以及油漆部份：

• 一般先進行水路改造，確定電掣插座以及來去水口位置，需時4至7日。
• 之後泥水師傅會整平地台同牆身、進行防水處理同鋪磚，需時12至30日。
• 木工同油漆通常會一齊做，因為部份木工需要油漆「收口」(即係填補縫隙)；而木工主要就係製作屋內嘅吊頂同電視背景牆，木工師傅亦會喺呢個時候進行「覆尺」，確保經過泥水工程後，傢俬尺寸依然準確。
• 當油漆工程做到大半，木工師傅會開始裝嵌訂造嘅傢俬、木門、門框等等，需時10至20日，確實日子視乎單位大細同傢俬多少而定。

小提示：如果要訂購磁磚、浴缸等，可以喺裝修中期嘅14至20日之前預訂，避免延誤水泥工程；另外為咗配合木工進度，亦都可以提早20至30日前訂購木門，並且最少7日前訂購木地板。

裝修後期：3至5日

• 去到裝修嘅尾聲，會鋪地板、安裝門窗、潔具以及五金掛件，呢部份相對較快，大約3至5日就可以完成。

總括而言，成個裝修工程起碼要預2個月，而前題係要有齊晒所有裝修材料。